ዜና እረፍት ፦ የኢትዮጵያ አትሌቲክስ አባት ዶክተር ወልደ መስቀል ኮስትሬ አረፉ፡፡


image


ዘውዱ በሬሳ | ግንቦት 7 ቀን 2008 ዓ.ም

ዜና እረፍት ፦ የኢትዮጵያ አትሌቲክስ አባት ዶክተር ወልደ መስቀል ኮስትሬ አረፉ

ከታላላቅ አትሌቶች እና ከታሪካዊ የአትሌቲክስ ድሎች ጀርባ ሁሌም ስማቸው የሚጠራው የቀድሞ የኢትዮጵያ ብሔራዊ አትሌቲክስ ቡድን ዋና አሰልጣኝ ዶክተር ወልደመስቀል ኮስትሬ ባደረባቸው ህመም ምክንያት ከዚህ አለም በሞት  ተለይተዋል፡፡

ለኢትዮጵያ አትሌቲክስ በተለይም ክብርና ዝና ለተገኘበት የረጅም ርቀት ሩጫ ጉልህ ሚና የተጫወቱትና ጠንካራ አሻራቸውን ማሳረፍ የቻሉት ዶ/ር ወልደመስቀል የዶክተርነት ማዕረግ ያገኙበትን ትምህርታቸውን በያኔዋ ሶሻሊስት አገር ሀንጋሪ የተከታተሉ ሲሆን፣ ከውጪ ቆይታቸው መልስም አገሪቱ በፈለገቻቸው የተለያዩ ዘርፎች አገልግለዋል፡፡

ወደአሰልጣኝነት ከመጡ በኋላም ኢትዮጵያን ወደ ታላቅ የረጅም ርቀት ውድድር አገር የቀየሩ በርካታ አትሌቶችን በማፍራት አስደናቂ ታሪክ ሰርተዋል፡፡

ከሀይሌ ገብረስላሴና ደራርቱ ቱሉ ጀምሮ እጅግ ብዙ አትሌቶችን ኮትኩተው ለድል ማብቃት የቻሉት ዶ/ር ወልደመስቀል በዲሲፕሊን ላይ ባላቸው ቁርጠኛ አቋም የሚታወቁ ሲሆን በአንድ ወቅት ለታይም መፅሔት በሰጡት ቃለ ምልልሳቸው “በአግባቡ እና በስርአቱ ሙያቸውን አክብረው እስከተንቀሳቀሱ ድረስ ለሁሉም አትሌቶቻችን ክብር እና ፍቅር አለን።” በማለት ለሙያ ክብር ቅድሚያ መስጠት እንደሚገባ መግለፃቸው ይታወሳል፡፡

ኢትዮአዲስስፖርት ድረገፅም ለቤተሰቦቻቸውና ለወዳጆቻቸው እንዲሁም ለመላው የኢትዮጵያ ህዝብ መፅናናትን ትመኛለች፡፡