በወንድወሰን ጥበቡ | ረቡዕ ጷግሜ 2፣ 2008 ዓ.ም


የፊታችን ቅዳሜ​ በታሪክ ውዱ የእግር ኳስ ጨዋታ ይደረጋል፤ በማንቸስተር ደርቢ።

የኦልትራፎርዱ ፍልሚያ ሁለቱ የአውሮፓ የአሰልጣኝ ፈርጦች ሆዜ ሞሪንሆ ፔፕ ጋርዲዮላ የሚታዩበት ትዕይንት ብቻም አይደለም። ይልንቁንስ በጨዋታው ላይ የሚሰለፉት ተጫዋቾች ድምር የዝውውር ክፍያ የሆነው 670 ሚሊዮን ፓውንድም ጨዋታው ትኩረት እንዲሰጠው ከሚያደርጉት ነገሮች መካከልም አንዱ ነው።

ማንችስተር ዩናይትድ በክረምቱ የዝውውር መስኮት ወቅት ከጁቬንቱስ በ93.25 ሚሊዮን ፓውንድ የዓለማችን ውድ የዝውውር ዋጋ ክበረ ወሰንን የያዘው ፖል ፖግባን ጨምሮ በዚህ ጨዋታ ላይ ሊያሰልፋቸው ይችላሉ ተብለው በተገመቱ 11 ተጫዋቾቹ ድምር የዝውውር ዋጋ በሆነው 350.55 ሚ.ፓ ይመራል።

ባለሜዳው ክለብ፣ ዩናይትድ በዚህ ጨዋታ ላይ ለክለቡ ሲፈርሙ በለጋ ዕድሜያቸው የዓለማችን የዝውውር ክብረወሰንን መስበር የቻሉት 57.6 ሚ.ፓ ወጪ የተደረገበትን አንቶኒ ማርሻልን፣ 28 ሚ.ፓ ወጪ የተደረገበትን ሉኬ ሻውን ጨምሮ 37.1 ሚ.ፓ የወጣበት ኹዋን ማታን፣ 30 ሚ.ፓ የተከፈለበት ኤሪክ ቤሊን፣ 27.5 ሚ.ፓ የተከፈለበትን ማሩዋን ፌላኒን እንዲሁም 27 ሚሊዮን ፓውንድ ለዝውውር ክፍያው ወጪ የተደረገበትን አምበሉን ዋይኒ ሩኒን ይዞ ወደሜዳ ይገባል ተብሎ ይጠበቃል።
እንዲሁም በነፃ ዝውውር ከፈረንሳዩ ክለብ ፒኤስጂ የተቀላቀለውን ስዊድናዊውን ኮከብም በመጀመሪያ ተሰላፊነት እንደሚያካትት ይጠበቃል።

በእንፃሩ በማንችስተር ሲቲ በኩል ይሰለፋሉ ተብለው የተገመቱት 11 ተጫዋቾች ድምር የዝውውር ወጪም 321.85 ሚሊዮን ፓውንድ ሲሆን፣ 53.5 ሚ.ፓ የተከፍለበት ኬቨን ደብሩይን፣ 50 ሚ.ፓ ወጪ የተደረገበት ጆን ስቶንስ፣ 49 ሚ.ፓ ወጪ የተደረገበት ራሂም ስተርሊንግ፣ 37 ሚ.ፓ የወጣበት ሊሮይ ሳኔ ለተሰላፊነት ከተገመቱትና ባለፉት ሁለት ዓመታት ዳጎስ ያለ ክፍያ ተከፍሎባቸው ክለቡን ከተቀላቀሉት ሌሎች ተጫዋቾች ጋር የሚጠቀሱ ናቸው።

እንደስካይ ስፖርት ዘገባ ከሆነም ከዚህ ቀደም የተደረገና በታሪክ ውዱ ጨዋታ የነበረው ባርሴሎና ሪያል ማድሪድን 4ለ0 በሆነ ውጤት ድል ያደረገበት በወርሃ ህዳር 2015 የተደረገው የኤልክላሲኮ ጨዋታ ነው።

በጨዋታው ሁለቱ የላ ሊጋው ኃያላን ክለቦች 562 ሚሊዮን ፓውንድ ድምር የተጫዋቾች የዝውውር ዋጋ ወጪ የተደረገባቸውን 22 ተጫዋቾችን ይዘው ወደሜዳ ገብተዋል።

Advertisements