ወንድወሰን ጥበቡ | ማክሰኞ መስከረም 10፣ 2008 ዓ.ም


​ቼልሲ አርብ ምሽት በሊቨርፑል የ2ለ1 ሽንፈት የደረሰበት መሆኑ ሮማን አብራሃሞቪች ከክለቡ አመራሮች ጋር እስከቅዳሜ ረፋድ ድረስ አስቸኳይ የሆነ ስብስባ ጠርተው እንዲቀመጡ አድርጓቸዋል። በስብሰባው ላይም አንቶኒዮ ኮንቴ በክረምቱ ባስፈረሟቸው ተጫዋቾች በጣም ደስተኛ አለመሆናቸውን ተናግረዋል።

እንደኤክስፕሬስ ጋዜጣ መረጃ ከሆነ የቼልሲው ባለቤት ሮማን አብራሃሞቪች ክለባቸው ባለፈው ሳምንት በደረሰበት ሽንፈት ብስጭት የተሰማቸው በመሆኑ በክለቡ የውድድር ዘመኑ ጅማሮ ላይ ለመነጋገር በጠረጴዛ ዙሪያ ተቀምጠዋል።

ሰማያዊዎቹ በውድድር ዘመኑ ዌስትሃምን፣ ዋትፎርድንና በርንሌይን በተከታታይ በመርታት እንደማንችስተር ሲቲና ማንችስተር ዩናይትድ ሁሉ ማግኘት ከሚገባቸው ዘጠኝ ነጥቦች ዘጠኙን በሙሉ ማግኘት ችለው የነበረ ቢሆንም፣ ከስዋንሲ ጋር 2ለ2 እንዲሁም ባለፈው ሳምንት ደግሞ በሊቨርፑል ሽንፈት ገጥሟቸዋል።

በዚህ ላይ ጆን ቴሪ ከዌልሱ ክለብ ጋር አቻ በተለያዩበት ጨዋታ የቁርጭምጭሚት ጉዳት ገጥሞት በሊቨርፑሉ ጨዋታ ላይ ሳይሰለፍ ቀርቷል። አምበሉ ምንም እንኳ ዛሬ ምሽት ከሌስተር ጋር በሚደረገው የእንግሊዝ ፉት ቦል ሊግ ጨዋታ ላይ ባይሰለፍም በሳምንቱ መጨረሻ ወደአርሴናል አምርተው በሚያደርጉት የፕሪሚየር ሊጉ ጨዋታ ላይ ግን እንደሚመለስ ይጠበቃል።

ነገር ግን ኮንቴ የክለቡ ብቃት እንዲያሻሽሉና ቼልሲ ያለበትን የተከላካይ ችግር እንዲቀርፉ ከወዲሁ ጫና እያረፈባቸው ይገኛል።

አብራሃሞቪች በክረምቱ ንጎሎ ካንቴን፣ ሚቺ ባትሹዋዪን፣ ማርኮስ አሎንሶን፣ ኤድዋርዶንና ዴቪድ ልዊዝን ቢያስፈርሙም ክለቡ በእጁጉ ይፈልጋቸው የነበሩትን የሴሪ ኣው ተከላካዮች ካሊዱ ኩሊባሊ እና አሊሲዮ ሮማኞሊን ማስፈረም አለመቻሉ ኮንቴን ጭንቀት ውስጥ እንዲገቡ አድርጓቸዋል።

በዚህ የተነሳም በዝውውር መስኮቱ መዝጊያ የመጨረሻ ቀን ክለቡን ከለቀቀ ሁለት ዓመታት በኋላ ዴቪድ ልዊዝን ከፒኤስጂ እንዲያስፈርሙም ተገደዋል። ኮንቴም ብራዚላዊው ተጫዋች በዝውውር ዕቅዳቸው ላይ እንዳልነበር ቀደም ብለው ተናግረዋል።

ቼልሲ የሪያል ማድሪዱን አልቫሮ ሞራታንና የቼልሲውን ሮሜሉ ሉካኩንም ለማስፈርም ሞክሮ ሳይሳካለት ቀርቷል። እንዲሁም በፔፕ ጋርዲዮላ ቡድን ውስጥ ብቃቱን እያሳየ የሚገኘውና በ2015 የዝውውር ዒላማቸው የነበረው ጆን ስቶንስም በ50 ሚሊዮን ፓውንድ ማንችስተር ሲቲን ተቀላቅሏል።

የኤክስፕሬስ ዘገባ አክሎም ምንም እንኳ የክረምቱ የዝውውር መስኮት ከተዘጋ ገና 20 ቀናት ብቻ ቢሆነውም ኮንቴ በቀጣዩ ጥር ወር ለዝውውር ገንዘብ የሚያስፈልጋቸው መሆኑን ለክለቡ ቦርድ ማሳወቃቸውን ገልፅዋል።

በሊቨርፑል የደረሰባቸው ሽንፈትም ኮንቴ በእንግሊዝ ፉትቦል ሊግ ጨዋታ ከአምናው የፕሪሚየር ሊግ ሻምፒዮን ጋር በሚያደርጉት የምሽቱ ጨዋታ ላይ እንደፋብሪጋዝ፣ ሎፍተስ-ቺክ፣ ቪክቶር ሞሰስ ያሉ እስካሁን የመጀመሪያ ተሰላፊነት ዕድል ላላገኙ ተጫዋቾች ዕድል እንዲሰጡ እንደሚያደርጋቸው ይጠበቃል። ቢትሹዋዪም በዲያጎ ኮስታ ፈንታ የአጥቂ ክፍሉን የሚመራም ይሆናል።

Advertisements