By Eyob Dadi |መስከረም 12 ቀን 2009 ዓ ም


ከምስራቅ አፍሪካ አገራት ፈጣን የእግርኳስ ለውጥ በማምጣት ክሬንሶቹ እየተባሉ የሚጠሩት ዩጋንዳዎች ቀዳሚ ናቸው።

 በዩጋንዳ ወደ ሌሎች የአፍሪካ አገራት እና ወደ አውሮፓ ወጣ ብሎ የፕሮፌሽናል የእግርኳስ ህይወትን መምራት ብርቅ መሆኑ ቀርቷል።

በሰርዶቪች ሙሉቲን ‘ ሚቾ ‘የሚሰለጥኑት የክሬንሶቹ የቡድን ስብስብ ከግማሽ በላይ ከአገሪቷ ውጭ በሚጫወቱ ተጨዋቾች የተዋቀረ ነው።

እዚሁ በኢትዮጵያ ፕሪምየርሊግ የሚጫወቱ በቅ/ጊዮርጊስ ውስጥ አራት የሚሆኑ(ኦዶንግካራ፣ኢሴንዴ፣ብሪያንናሙግሬዋ) የዩጋንዳ ተጨዋቾች ሲኖሩ ከነዚህ ውስጥ ትናንትና ዩጋንዳዎች ላሉባቸው ጨዋታዎች ብሄራዊ ቡድኑ ውስጥ ያካተቱት ኢሳክ ኢሲንዴ ብቻ ነው።

ይህ ደግሞ ክሬንሶቹ ምን ያህል ብዛት ያለው የተጨዋቾች አማራጭ እንዳላቸው ፍንጭ ሊሰጠን ይችላል።

በኢትዮጵያ ፕሪምየር ሊግ 2003 አጋማሽ ላይ ቅ/ጊዮርጊስን የተቀላቀለው፣በተደጋጋሚ ጊዜም የሊጉ ኮከብ ግብ ጠባቂ በመሆን የተመረጠው ዩጋንዳዊው ሮበርት ኦዶንግካራ ነው።

ግብ ጠባቂው ከኢትዮጵያዊያን ግብ ጠባቂዎች አንጻር ምን ያህል የተሻለ መሆኑን ለማወቅ በተደጋጋሚ ኮከብ ግብ ጠባቂ የተባለበት አመታት መቁጠር ብቻ በቂ ነው።

ነገርግን እኛ ጋር ንጉስ የሆነው ግብ ጠባቂ በዩጋንዳ ብሄራዊ ቡድን ስብስብ ውስጥ እንኳን አልተካተተም።

በተመሳሳይ  በደ/አፍሪካና በሌሎች የአፍሪካ አገራት እየተጫወቱ አገራቸው ዩጋንዳን ለማገልገል የናፈቁ፣ የብ/ቡድኑ ጥሪ የራቃቸው ይገኛሉ።

ህዳር ወር 2008 ዓ ም በአገራችን ተዘጋጅቶ የነበረው የሴካፋ ውድድር ላይ አሸናፊ ከሆኑት የቡድኑ አባላት ውስጥ እንደ ፋሩክ ሚያ አይነት ወጣት ተጨዋቾች ወደ አውሮፓ ካቀኑት ውስጥ ይጠቀሳሉ።

እነ ጆሴፍ ኦቻያ ደግሞ ምንም እንኳን አሁንም በአገራቸው ቢሆኑም በቅርቡ ወደ ሌሎች አገራት ለማቅናት መንገድ ላይ ናቸው።

የኛስ ተጨዋቾች ጉዳይ?

ቀድሞውኑ ከአገር ውጭ ይጫወቱ የነበሩት ጥቂት ተጨዋቾቻችን አብዛኛዎቹ ወደ አገርቤት ተመልሰዋል።

ወደ ውጭ ወጥቶ የፕሮፌሽናል የእግርኳስ ህይወት መምራት ለኛ አገር ተራራ እንደ መውጣት ሆኗል።

ከአገር ወጥቶ መጫወት ብዙ ጥቅም እንዳለው ማስረዳት አያስፈልግም።የወቅቱ የጌታነህ ከበደ የአቋም ለውጡ በተሻለ ሊግ ላይ ከመጫወቱ የመጣ እንደሆነ ግልጽ ነው።

 በውጭ የሚጫወቱ ተጨዋቾቻችን ከጊዜ ወደ ጊዜ ማነስ ከፉክክር አልባው የውስጥ ሊጋችን ጋር ተደምፎ ወደፊት ብ/ቡድናችን ላሉበት ጨዋታዎች በቀላሉ እጅ እንዳይሰጥ ያሰጋዋል።

በርግጥ የአንድ ብ/ቡድን ጥንካሬ በውጭ በተሻለ ሊግ ላይ በሚጫወቱ የተጨዋቾች ብዛት ብቻ አይገለጽም።

የውስጥ የሊግ ውድድሮች ጥንካሬም የብ/ቡድኑ ብርታት ነጸብራቆች በመሆናቸው የውስጥ የፕ/ሊግ ውድድሮች ከዚህ በተሻለ ማሳደግና ተፎካካሪ ማድረግ ያስፈልጋል።

በተለይም አሁን ከምስራቅ አፍሪካም ይሁን ከአፍሪካ የስፓርት ማዘውተሪያ ልማቶችን በመገንባት ኢትዮጵያ ተጠቃሽ ሆናለች።

ስለዚህ ለተገነቡት አዳዲስ ስታድየሞች የሚመጥን የሊግ መዋቅር እና ፉክክር መፍጠር ከተቻለ በውስጥ ጠንካራ ውድድሮች ብቻ ጥሩ ብ/ቡድን ለፍጠር እንደሚቻል መረዳት ይኖርብናል።

ከ 38 አመት በኋላ ለአፍሪካ ዋንጫ ያለፈችው ዩጋንዳ ከአፍሪካ ዋንጫው ቀደም ብላ ወደ ስፔን በማቅናት ለሁለት ሳምንት ልምምድ እንደሚያደርጉ ታውቋል።

በስፔን ቆይታቸውም 3 የአቋም መፈተሻ ጨዋታዎች የሚያደርጉ ይሆናል።

ክሬንሶቹ ለአለም ዋንጫ ማጣሪያ የምድብ ድልድል ውስጥም መግባታቸው ይታወሳል።

Advertisements