Advertisements
ትኩስ ዜናዎች

ካፍ ኮንፌዴሬሽን ዋንጫ: – ቲፒ ማዚምቤ እና ሞ ቤጃያ ለዋንጫ ፍጻሜ ደረሱ

By Eyob Dadi


የ 2016 የካፍ ኮንፌዴሬሽን ዋንጫ ለፍጻሜ ያለፉ ሁለት ቡድኖች ተለይተው ታውቀዋል።

በዲሞክራቲክ ኮንጎ ሉብምባሺ ላይ የተደረገው የቲፒ ማዚምቤ እና የቱኒዚያ ኢቶይል ዱ ሳህል የመልስ ጨዋታ ያለ ጎል ተጠናቋል።

ተመጣጣኝ እንቅስቃሴ የታየበት የሁለቱ ቡድኖች ጨዋታ ሁለቱም ለጎል የቀረቡ ሙከራዎችን አድርገዋል።

በተለይ ሬንፎርድ ካላባ ሁለት ተጨዋቾችን አታሎ የመታው ኳስ እንዲሁም

የጨዋታው መጠናቀቂያው በተቃረበበት ሰአትም አጥቂው ኮንጎዋዊው ዲዎ ካንዳ ከግብ ጠባቂ ጋር ፊት ለፊት ተገናኝቶ መጠቀም ያልቻለው ኳስ ለባለሜዳዎቹ የሚያስቆጩ አጋጣሚ ነበሩ።

ሁለቱ ቡድኖች ባሳለፍነው ሳምንት ቱኒዚያ ላይ ተጫውተው 1-1 የተለያዩ በመሆኑ በድምር ውጤት እኩል ቢሆኑም ከሜዳ ውጭ ባስቆጠረው ጎል ቲፒ ማዚምቤ ለፍጻሜ ማለፉን አረጋግጧል።

በጨዋታው መጠናቀቂያ ላይ የቡድኑ አሰልጣኝ ፈረንሳዊው ሁበርት ቬሉድ በደስታ ስሜት ውስጥ ሆነው ታይተዋል።

ቲፒ ማዚምቤ ወደ ምድብ ድልድል ለመግባት በተደረገው ማጣሪያ ላይ ከኢትዮጵያው ቅ/ጊዮርጊስ ጋር መጫወቱ ይታወሳል።

ሌላው የግማሽ ፍጻሜ የመጨረሻ የመልስ ጨዋታ የነበረው ሁለቱ የሰሜን አፍሪካ ቡድኖችን ያፋጠጠው የሞሮኮው ፉስ ራባት እና የ አልጄሪያው ሞ ቤጃያ ጨዋታ ነበር።

ሁለቱ ቡድኖች የመጀመሪያውን ጨዋታ ያለምንም ግብ የተለያዩ በመሆኑ የመልሱ ጨዋታ ተጠባቂ ነበር።

በራባት ኮምፕሌክስ ስፓርቲፍ ፕሪንስ ሙሌይ አብደላ ስታድየም የተደረገው ጨዋታ በመጀመሪያው ግማሽ ሁለቱም ቡድኖች ለጎል ቢቀርቡም የጎል አግድም መልሶባቸዋል።

ከእረፍት መልስ ጫና ፈጥረው የተጫወቱት ባለሜዳዎቹ ፉስ ራባት 73ኛው ደቂቃ ላይ ከማእዘን የተሻማውን ኳስ መሀመድ ናሂሪ ባስቆጠረው ኳስ ባለሜዳዎቹ ለማሸነፍ ተቃርበው ነበር።

ነገርግን የጨዋታው መጠናቀቂያ 89ኛው ደቂቃ ላይ አልጄሪያዊው ፋውዚ ራሀል ለ ሞ ቤጃያ ያስቆጠረው ኳስ ጨዋታው 1-1 እንዲጠናቀቅ አድርጎታል።

የአልጄሪያው ሞ ቤጃያ በሁለተኛው ግማሽ ሙሉ ለሙሉ ሲከላከሉ የቆዩ ሲሆን በጨዋታው መጨረሻ ያገኙትን ብቸኛ አጋጣሚ ወደጎል ከቀየሩ በኋላ ደስታቸው ልዩ ነበር።

በዚህም መሰረት ጨዋታው በአጠቃላይ  ውጤት 1-1 በመጠናቀቁ ሞ ቤጃያ ከሜዳ ውጭ ባስቆጠረው ጎል ተጠቅሞ ለፍጻሜ በቅቷል።በፍጻሜውም ከቲፒ ማዚምቤ ጋር ይገናኛል።

Advertisements
About ዕዮብ ዳዲ (1158 Articles)
ይህን ጽሁፍ ያዘጋጀሁላችሁ የኢትዮአዲስ ስፓርት ድረገጽ አዘጋጅ እና የስፓርት ፀሀፊ ዕዮብ ዳዲ ነኝ።
%d bloggers like this: