Advertisements
ትኩስ ዜናዎች

ቀይ ቀበሮዎቹ ለማዳጋስካሩ የአፍሪካ ከ17 አመት በታች ዋንጫ ማለፍ ሳይችሉ ቀሩ

ዳዊት ፀሀዬ|መስከረም 22፣2008


በመጪው የፈረንጆቹ አዲስ አመት በማዳጋስካር አስተናጋጅነት ለሚካሄደው የአፍሪካ ከ17 አመት በታች ዋንጫ ለማለፍ ከጫፍ ደርሰው የነበሩት ቀይ ቀበሮዎቹ በማሊ አቻቸው በድምር ውጤት 4-1 ተሸንፈው ከውድድሩ ውጪ ሆኑ፡፡

በመጀመሪያው የባማኮ ጨዋታ ከ76ተኛው ደቂቃ በኃላ በጨዋታ እና በፍፁም ቅጣት ምት በተቆጠረባቸው ሁለት ግቦች 2-0 ተሸንፈው የተመለሱት ቀይ ቀበሮዎቹ ለአፍሪካ ዋንጫው ለማለፍ በዛሬው ጨዋታ የግድ በ3 ጎል ማሸነፍ ይጠበቅባቸው ነበር፤ ነገር ግን ይህንን ማድረግ ሳይችሉ በዛሬው የአዲስ አበባ ስታዲየም ወሳኝ የመልስ ጨዋታ 2-1 በሆነ ውጤት ዳግም በማሊ አቻቸው ሊረቱ ችለዋል፡፡

የማለፍ የሰፋ እድልን ይዘው ጨዋታውን የጀመሩት ማሊዎች ጨዋታው ከተጀመረ ገና በሶስተኛው ደቂቃ ላይ ሲቤሪ ኬይታ ባስቆጠራት ግብ 1-0 መምራት ጀመሩ፤ ይህችም ግብ የማሊዎችን የማለፍ እድል ስታሰፋ በአንፃሩ የኢትዮጵያ ቡድንን የማለፍ እድል አጣብቂኝ ውስጥ የከተተች ሆና ተመዝግባለች፡፡

በግቧ የተደናገጡ የሚመስሉት የአሰልጣኝ አጥናፉ አለሙ ልጆች ወደ ጨዋታው ዳግም ለመመለስ 20 ደቂቃዎች አስፈልጓቸዋል፤ ለማለፍ አራት ግብ የሚያስፈልጋቸው ቀይ ቀበሮዎቹ ከግቧ መቆጠር በኃላ በተደጋጋሚ አላማ የለሽ ረጃጅም ኳሶችን ወደ ፊት ሲጥሉ ተስተውሏል፤ ይህም በጨዋታው በኢትዮጵያ ቡድን በኩል ፊት ላይ ብቻውን የተሰለፈው ጫላ ተሺታ ጋር ሳይደርሱ በቀላሉ በማሊ ተከላካዮች ሲመለሱ ተስተውሏል፡፡

በዚሁ የመጀመሪያ አጋማሽ 44ተኛው ደቂቃ ላይ አክሊሉ አለሙ የመታትና የግቡ አግዳሚ የመለሳትን ኳስ ቃልኪዳን ዘላለም ዳግም ወደ ግብ ሞክራት የማሊው ግብጠባቂ የመለሰበት ኳስ በኢትዮጵያ በኩል የሚያስቆጭ አጋጣሚ ነበር፡፡

በሁለተኛው አጋማሽ በአንፃራዊነት የተሻለ መንቀሳቀስ የቻሉት ቀይ ቀበሮዎቹ ያገኙዋቸውን አጋጣሚዎች በአግባቡ የመጠቀም ችግር ተስተውሏል፡፡

በዚሁ አጋማሽ አሰልጣኝ አጥናፉ ሶስት ተጫዋቾችን ቀይረው በማስገባት ውጤቱን ለመቀየር የተቻላቸውን ጥረት አድርገዋል፤ ይህም ቅያሬያቸው ፍሬ አፍርቶ በ72ተኛው ደቂቃ ላይ በመጀመሪያው አጋማሽ መገባደጃ ላይ ረመዳን ዮሱፍን ቀይሮ የገባው ፋሲል አበባየሁ የአቻነቷን ግብ ማስቆጠር ችሏል፡፡

ነገርግን በ92ተኛው ደቂቃ ላይ የኢትዮጵያ ተጫዋቾች ሙሉ ለሙሉ ለማጥቃት በወጡበት ወቅት ማሊዎች በፈጣን የመልሶ ማጥቃት በማህማኔ ቱሬ አማካኝነት ሁለተኛ ግብ አስቆጥረው ጨዋታው በማሊ የ2-1 አሸናፊነት ሊጠናቀቅ ችሏል፡፡

በዚህምክንያት የማሊ ከ17 አመት በታች ብሔራዊ ቡድን በድምር ውጤት የኢትዮጵያ አቻውን 4-1 በማሸነፍ በማዳጋስካር አስተናጋጅነት ለሚካሄደው የአፍሪካ ወጣቶች ዋንጫ ማለፉን አረጋግጧል፡፡

Advertisements
About ዕዮብ ዳዲ (1428 Articles)
ይህን ጽሁፍ ያዘጋጀሁላችሁ የኢትዮአዲስ ስፓርት ድረገጽ አዘጋጅ እና የስፓርት ፀሀፊ ዕዮብ ዳዲ ነኝ።
%d bloggers like this: