ዘውዱ በሬሳ | ጥቅምት 2 ፣ 2009

የፓሪስ ሴንት ጀርሜይኑ የተከላካይ ስፍራ ተጫዋች ሰርጂ ኦሪየር የማሊውን ሙሳ ዱምቢያን ህይወት በአስደናቂ ሁኔታ ማትረፍ ችሏል፡፡

ክስተቱ የተፈጠረው የአለም ዋንጫ የማጣሪያ ጨዋታዎች በተካሄዱበት የሳምንቱ መጨረሻ ሲሆን ኦሪየርን የያዘችው አይቮሪ ኮስት የማሊ አቻዋን በገጠመችበት ጨዋታ ነበር፡፡

በጨዋታው መሀል የማሊው ሙሳ ዱምቢያ በድንገት ተዝለፍልፎ ሜዳው ላይ የወደቀ ሲሆን ህይወቱም ወደማለፉ ተቃርቦ ነበር፡፡ ነገር ግን በአቅራቢያው የነበረው ኦሪየር በፍጥነት ደርሶ ቀና ካደረገው በኋላ እየዋጠው የነበረውን ምላሱን ጎትቶ በማውጣት የተጫዋቹን እስትንፋስ መታደግ ችሏል፡፡
ይህን ድርጊት ተከትሎ ሙገሳዎች ከየአቅጣጫው ለኦሪየር እየጎረፉለት ሲሆን የማሊው አለቃ ፎሱኒ ዲያዋራ “ተጫዋቻችን ተዝለፍልፎ ህይወቱን ለማጣት በተቃረበበት ወቅት ከአንድ የኛ ተጫዋች ጋር የደረሰለት ኦሪየር ነው፡፡ ምላሱን በመጎተት አትርፎታል፡፡ የተቃራኒ ቡድን ተጫዋችነቱ ሰብአዊነቱን አላገደበትም ” በማለት አሞካሽተውታል፡፡

በጨዋታው አይቮሪ ኮስት የማሊ አቻዋን 3 ለ 1 በሆነ ውጤት ማሸነፍ ችላለች፡

Advertisements