images

By Eyob Dadi

ናይጄሪያ፡ዛምቢያ፡አልጄሪያ እና ካሜሮን በሚገኙበት የሞት ምድብ ተብሎ የተሰመው ምድብ ሁለት ናይጄሪያዎች ከትናንት ምሽት ውጤት በኋላ የራሺን የአለም ዋንጫ በቅርበት እንዲያስቡ አድርጓቸዋል፡፡

በቀጣዩ የአፍሪካ ዋንጫ ላይ ለመሳተፍ ያልታደሉት ናይጄሪያዎች ለ 2018 የአለም ዋንጫ አፍሪካን ወክሎ ለመሳተፍ መልካም ጅማሮን አድርገዋል፡፡ከሳምንታት በፊት ወደ ዛምቢያ አቅንተው አሸንፈው የተመለሱት ናይጄሪያዎች ትናንትና ምሽት የወቅቱ ጠንካራ የአፍሪካ ቡድን የሆነውን አልጄሪያን በሜቸዳው አስተናግደው አሸንፈዋል፡፡

በተመልካች በተጨናነቀው ስታድየም የተደረገው የምሽቱ ጨዋታ ናይጄሪያ በቸልሲዎቹ ቪክተር ሞሰስ ሁለት ጎል እና ጆን ኦቢ ሚኬል በመታገዝ አልጄሪያን 3-1 ማሸነፍ ችላለች፡፡

ናይጄሪያ የመጀመሪያውን ግማሽ 2-0 በመምራት ወደ መልበሻ ቤት ለእረፍት ቢያመሩም ከእረፍት መልስ አልጄሪዎች አጨዋወታቸውን አሻሽለው በማጥቃት ተጫውተዋል፡፡በተደጋጋሚም ወደ ናይጄሪያዎች ግብ ክልል በመጠጋት አደጋ ለመፍጠር ሙከራ አድርገዋል፡፡

አልጄሪዎች ብቸኛ ጎላቸውንም ያገኙት በዚሁ ጊዜ በናቲብ ቤንታሌብ ድንቅ የርቀት ጎል የነበረ ሲሆን የቪክተር ሞሰስ የመጨረሻ ደቂቃ ጎል የአልጄሪያዎችን የአቻ ተስፋ ያጨለመ ነበር፡፡ጨዋታውም 3-1 ተጠናቋል፡፡

የጨዋታው አስገራሚ ነገር ጆን ኦቢ ሚኬል ያስቆጠረው የናይጄሪያዎቹ  ጎል ነበር፡፡ሜኬል ከአልጄሪያዎች የአደጋ ክልል የተላለፈለት ኳስ የአልጄሪያ ተከላካዮች በኦፍሳይድ አቋቋም ላይ ያለ መስሏቸው ቆመው እየተመለከቱት ነበር፡፡

እሱም ከጨዋታ ውጭ የሆነ መስሎት ኳሱን ተቆጣጥሮ ቆሞ የመስመር ዳኛውን ከተመለከተ በኋላ ተረጋግቶ አስቆጥሮታል፡፡

በዚሁ ምድብ የተደረገው ሌላው ጨዋታ ካሜሮን ከዛምቢያ ጋር 1-1 የተለያየች ሲሆን ይህም ውጤት የናይጄሪያዎችን ድል እጥፍ አድርጎታል፡፡ምድቡንም ናይጄሪያ በ 6 ነጥብ ስትመራ ካሜሮን በ 2 ነጥብ ትከተላለች፡፡

 

Advertisements