በወንድወሰን ጥበቡ | ህዳር 26፣ 2009 ዓ.ም


ሰርጂዮ አግዌሮ ክለቡ ማንችስተር ሲቲ ቅዳሜ ከቼልሲ ጋር ባደረገው ጨዋታ ቀይ ካርድ መመልከቱን ተከትሎ በእንግሊዝ እግር ኳስ ማህበር የአራት ጨዋታ ቅጣት ተላልፎበታል። 

የማንችስተር ሲቲው ኮከብ በቼልሲው ተከላካይ ዴቪድ ልዊዝ ላይ በሁለት እግሩ እሰቃቂ የሆነ ጥፋት መፈፀሙ ለእነዚህ የጨዋታ ቅጣቶች ዳርጎታል።

እንደሰርጂዮ አግዌሮ ሁሉ በቅዳሜ ዕለቱ ጨዋታ ከሴስክ ፋብሪጋዝ ጋር  ግጭት ውስጥ መግባቱን ተከትሎ ቀይ ካርድ የተመለከተው አማካኙ ፈርናንዲንሆም የሶስት ጨዋታዎች ቅጣት ተላልፎበታል።

ነገር ግን እስካሁን በተደረጉት የፕሪሚየር ሊግ ጨዋታዎች ላይ 10 ግቦችን ከመረብ ያሳረፈውን ሰርጂዮ አግዌሮን ግልጋሎት ከሌስተርና ከአርሰናል ጋር የሚደረጉ ቁልፍ ጨዋታዎችን ጨምሮ በአራት ጨዋታዎች ላይ ማጣቱ ለሲቲ ከባድ እንደሚሆንበት ይጠበቃል።

አግዌሮ በዚህ የውድድር ዘመን በእግር ኳስ ማህበሩ የቅጣት ውሳኔ ሲተላለፍበት ይህ ለሁለተኛ ጊዜ ሲሆን ከዚህ ቀደም የዌስትሃሙን ተከላካይ ዊንስቴን ሪድን በክርኑ በመማታቱ ምክኒያት የሶስት ጨዋታዎች ቅጣት ተጥሎበት እንደነበር ይታወሳል።

Advertisements