Skip to content
Advertisements

የብላተር የእገዳ ይነሳልኝ አቤቱታ ውድቅ ተደረገ

​በMikiyas B. Wordofa | ህዳር 30፣ 2009 ዓ.ም


የሰማንያ አመቱ ሴቭ ብላተር ያለአግባብ ገንዘብ ከመክፈል ጋር በተያያዘ ክስ ምክንያት በአለም የስፖርት ስነምግባር ኮሚቴ ለስድስት አመታት በማንኛውም የእግር ኳስ እንቅስቃሴ እንዳይሳተፉ መታገዳቸው ይታወሳል፡፡ ወርልድ ሶከር መፅሄት በዛሬው እለት እንደዘገበው ከሆነ ደግሞ ይህ የእገዳ ውሳኔ ትክክል መሆኑን በመግለፅ የአለም የስፖርት ግልግል ተቋም (ካስ) የብላተርን ይግባኝ ውድቅ አድርጎ የኮሚቴውን ውሳኔ ማፅናቱ ታውቋል፡፡ 

እንደ መፅሄቱ ገለጻ በወቅቱ ኮሚቴው ለእገዳው የሰጠው ምክንያት ብላተር በ2011 ለቀድሞው የአውሮፓ እግር ኳስ ማህበር ፕሬዝዳንት ሚሼል ፕላቲኒ ያልተገባ የ 2 ሚሊየን የስዊዝ ፍራንክ ክፍያን ፈፅመዋል የሚል ነበር፡፡ ብላተር ግን ክፍያውን የፈፀሙት ከአስር አመታት በፊት ፕላቲኒ ለፈፀመላቸው አንድ ስራ እንደሆነና ምንም ህገወጥ ክፍያ የሚያሰኝ ምክንያት እንደሌለና ክፍያውም ከስራቸው ጋር እንደማይያያዝ በመግለፅ መከራከሪያቸውን ማቅረባቸው ይታወሳል፡፡ 

ብላተር በመጀመሪው ውሳኔ በኮሚቴው የስምንት አመት አገዳና የ50,000 ስዊዝ ፍራንክ እገዳ ቢጣልባቸውም ጉዳዩን ለፊፋ ቅሬታ ሰሚ ተቋም በአቤቱታ መልክ በማቅረብ እገዳው ወደ ስድስት አመት እንዲወርድላቸው ተደርጓል፡፡ በግንቦት 2015 ፊፋን እንዲመሩ በድጋሚ ተመርጠው የነበሩት ብላተር በክሳቸው ዙሪያ የነበረውን አሉባልታ መሸከም ባለመቻላቸው በተመረጡ አራተኛ ቀናቸው ስልጣናቸውን በገዛ ፈቃዳቸው በመልቀቃቸው ጂያኒ ኢንፋንቲኖ መንበረ ስልጣኑን እንዲረከቡ መደረጉ የወቅቱ ትልቅ ርዕስ ነበር፡፡ 

ብላተር ከካስ ውሳኔ በኋላ ስለ ውሳኔው ያላቸውን ስሜት ሲጠየቁ ጉዳዩ ‘አስቸጋሪ’ ቢሆንም የካስ ውሳኔ ይግባኝ የሌለው የመጨረሻ ውሳኔ በመሆኑ እንደሚቀበሉት ገልፀዋል፡፡ በመጨረሻም “በፊፋ በቆየሁባቸው 41 አመታት በጣም ብዙ ልምዶችን ቀስሜያለሁ፡፡ በአብዛኛው በስፖርት ውስጥ ማሸነፍ እንደምትችል ነገር ግን በአንዳንድ አጋጣሚዎች ልትሸነፍ እንደምትችል ተምሬያለሁ፡፡ ለእግር ኳስና ለፊፋ ያለኝን ያበረከትኩባቸውን ያለፉትን አመታት በጣም አከብራቸዋለሁ::” ሲሉ ውሳኔውን በጸጋ እንደሚቀበሉ ከውሳኔው በኋላ ለጋዜጠኞች ተናግረዋል፡፡

በተያያዘ ሌላ የቢቢሲ ዜና የቀድሞው የፊፋ ፕሬዝዳንት ሴፕ ብላተር አዲሱ የፊፋ ተመራጭ ፕሬደንት የሆነው ጂያኒ ኢንፋንቲኖ አክብሮት ሳያሳያቸው በመቅረት ስልካቸውን እንደማይመልስላቸው በመግለፅ ወቀሳ ሰንዝረዋል።

ብላተር በፊፋ ላይ “ለሚነሱ ጥያቄዎች መፍትሄ ለመስጠት” ከኢንፋንቲኖ ጋር ተገናኝተው እንደነበር ገልፀዋል።

ነገር ግን “[ኢንፋንቲኖ] በዚያ ላይ እሰራለው ካለ በኋላ ፈፅሞ ተመልሶ አልመጣም።” ሲሉ ተናግረዋል።

Categories

ፊፋ

Advertisements
%d bloggers like this: