Advertisements
ትኩስ ዜናዎች

“እስከ 50 አመቴ ድረስ መጫወት የሚያስችል አቅም አለኝ” ኢብራሂሞቪች

በዘውዱ በሬሳ | ታህሳስ 10 ቀን 2009 ዓ.ም

በክረምቱ ዝውውር ማንችስተር ዩናይትድን ከተቀላቀለ በኋላ እንደተጠበቀው የቡድኑ አስፈላጊ ተጫዋች መሆን የቻለው ዝላታን ኢብራሂሞቪች ራሱን ከ”ጣፋጭ ቀይ ወይን” ጋር በማመሳሰል እድሜው በጨመረ ቁጥር ብቃቱ የበለጠ እያደገ እና እየጎለበተ እንደሚሄድ ተናግሯል፡፡

ቀዮቹን በፊት አጥቂነት መምራት ከጀመረበት የኮሚኒቲ ሺልድ ዋንጫ ጀምሮ 16 ጎሎችን ከመረብ በማሳረፍ ሁነኛ የጎል ማሽን መሆኑን እያስመሰከረ የሚገኘው “ኢብራካዳብራ” ከየአቅጣጫው አድናቆቶች እየጎረፉለት ሲሆን ካለፉት ሰባት የክለቡ የፕሪምየር ሊግ ጎሎች አምስቱ በሱ መቆጠራቸው በምርጥ አቋሙ ላይ ለመገኘቱ ማሳያ ነው፡፡

ኢብራ ስለጉዳዩ ለሚዲያ አካላት ሲያብራራ “ቀይ ወይን ታውቃላችሁ? ትወዳላችሁ አይደል? ቀይ ወይን እያደር ጣህሙ የላቀ ይሆናል ፤ እኔ ማለት እንደዛ ነኝ! እድሜዬ በጨመረ ቁጥር ፍላጎትና ብቃቴ ይበልጥ ይንራል፡፡ 35 ዓመት ዕድሜዬ ላይ ብገኝም የ20 አመት ወጣት ተነሳሽነት አለኝ ፤ ከፈለግሁ እስከ ሀምሳ አመቴ ድረስ በሚገባ መጫወት እችላለሁ” ሲል አስረድቷል፡፡

“የሌሎች አገሮች ሊጎችን በፍጥነት እንደተላመድኩ ሁሉ እዚህም በቶሎ እየተዋሃድኩ እገኛለው፡፡ በርግጥ ሊጉ እጅግ ፈጣንና ኳሶች በቅፅበት ወደፊትና ወደኋላ የሚመላለሱበት ነው ፤ ቢሆንም በዛ ፍጥነት ውስጥ ራሴን ማሳየት ችያለሁ ” በማለት አጠቃሏል፡፡

በቅዳሜ ምሽቱ የፕሪምየር ሊግ ጨዋታ በዝላታን ሁለት ጊዜ መረቡ የተደፈረበት የቀድሞ የዩናይትድ የአሁኑ የዌስት ብሮም ግብ ጠባቂ ስለተጫዋቹ ተጠይቆ ሲናገር
“የአየር ላይ ችሎታው የሚደንቅ ነው ፤ጠንካራና ኃይለኛ ነው ፤ ሁለተኛውን ጎል ተመልከቱት-ሌሎች ተጫዋቾች ቢሆኑ ለጓደኞቻቸው ማቀበልን ምርጫቸው ያደርጉ ነበር፡፡ እሱ ግን ሳልጠብቀው ወደኔ መታውና አስቆጠረብኝ::35 ዓመቱ ነው?  የፈጣሪ ያለህ” ሲል ነበር የተናገረው፡፡

Advertisements
%d bloggers like this: