በ ወንድወሰን ጥበቡ – ታህሳስ 12፣ 2009 ዓ.ም


ባየር ሙኒክ ከ ሌፕዚግ
የጀርመን ቡንደስሊጋ
ቀን: ረቡዕ ታህሳስ 12፣ 2009 ዓ.ም
ሰዓት:  ምሽት 4:00
ሜዳ: አሊያንዝ አሬና፣ ሙኒክ


ይህ ጨዋታ ረቡዕ ምሽት ባየር ሙኒኩ በሜዳው አሊያንዝ አሬና አርቢ ሌፕዚግን የሚያስተናግድበትና የቡንደስሊጋው የውድድር ዘመኑ የመጀመሪያ አጋማሽ የደረጃ ስንጠረዡን መሪ የሚለይበት የደርቢ ጨዋታ ነው። ሁለቱ ክለቦች በሶስተኛ ደረጃ ላይ ከሚገኙት ሆፈኒየምና ኸርታ በርሊን በግብ ብቻ ተበላልጠው በደረጃው አናት ላይ በዘጠኝ ነጥቦች ርቀው ይገኛሉ። ባቫሪያኑ ግን ወደዚህ ጨዋታ የሚገቡት በሁሉም ውድድር ላይ በተከታታይ አምስት ጨዋታ ድል በማድረግ የተሻለ ድባብ ውስጥ በመሆን ነው። 

የካሮ አንቸሎቲው ቡድን በአስደናቂ ሁኔታ በሁሉም ውድድሮች ላይ በሜዳው አሊያንዝ አሬና ሽንፈት አልገጠመውም። እንዲሁም በተከታታይ ከአትሌቲኮ ማድሪድ፣ ዎልፍስበርግና ዳርምሽታድ ጋር ባደረጋቸው ተከታታይ ጨዋታዎች የማኑኤል ኖየርን መረብ ያላስደፈረ ጠንካራ የተከላካይ ክፍል አለው።

በሌላ በኩል የዘንድሮው ድንገተኛ ክስተት መሆን የቻለው አርቢ ሌፕዚግ ምንም እንኳ በውድድር ዘመኑ ደካማ አቋም እያሳየ ከሚገኘው ኢንጎልሽታድንጋር ባደረገው ጨዋታ ኳስና መረብ ማገናኘት ሳይችል ቢቀርም ከዚያ ቀደም ከሜዳው ውጪ ባደረጋቸው ስምንት ተከታታይ ጨዋታዎች ላይ በሙሉ ግን አስደናቂ ድሎችን ማስመዝገብ ችሏል። ባለፈው የሳምንቱ መጨረሻ በሜዳው ከኸርታ በርሊን ጋር ባደረገው ጨዋታ ላይ ፈተና ገጥሞት በራልፍ ሃሰንኸትልሱ ቡድን 2ለ0 በመረታቱ ብዙዎች ዘንድ የሌፕዚግ ጉዞ መጨረሻ እንደደረሰ ቢተሰብም በቀድሙት ጨዋታዎች ላይ ባሳየው ብቃት የተነሳ ግን ለባየር ሙኒክ ግን ቀላል ተጋጣሚ እንደማይሆን ይጠበቃል።

የሁለቱ ቡድኖች የርስበርስ ግንኙነት

አርቢ ሌፕዚግ የተመሰረተው በ2009 በመሆኑና ይህን የጀርመን ሊግ ሲቀላቀል የመጀመሪያው እንደመሆኑ ይህ ጨዋታ ለሁለቱ ክለቦች በታሪካቸው የመጀመሪያ ይሆናል።

በጨዋታው የሚጠበቁ ግምታዊ ውጤቶች

ሁለቱም ክለቦች በዚህ የውድድር ዘመን በማጥቃቱ ሚና ኃይለኛ የሆነ ብቃት ማሳየት በመቻላቸው በጨዋታው ላይ አነስተኛ ግቦች አይጠበቁም። ሮበርት ሊቫንዶውስኪ እስካሁን ለባቫሪያኑ 11 ግቦችን ሲያስቆጥር፣ በአንፃሩ የሌፕዚጉ አጥቂ ቲሞ ዋርነር ባለፈው ሳምንት የውድድር ዘመኑን ዘጠነኛ ግብ ማስቆጠር ችሏል።

Advertisements