በሚኪያስ በ. ወርዶፋ | ሰኞ ጥር 1፣ 2009


ከሰሞኑ መድፈኞቹ ከአርሰን ቬንገር የተለመደ የዝውውር አካሄድ በተቃራኒ ስማቸው ውድ ዋጋ ከተለጠፈበት ተጫዋች ጋር መያያዝ ጀምሯል። የጣሊያኑ ቶሪኖ ክለብ ስፓርቲንግ ዳይሬክተር ጂያንሉካ ፔትራቺ “አዎ ጥያቄ ቀርቦልናል” ሲሉ ጭምጭምታው ወደ እውነት ስለማምራቱና ቬንገር እርግጥም ቤሎቲን ለማስፈረም ጥረት መጀመራቸውን አረጋግጠዋል። 

ምንም እንኳን ተጫዋቹ በያዝነው የጥር የዝውውር መስኮት ክለቡን አይለቅም ብለው ፔትራቺ ጨምረው በመናገር የቀረበውን የዝውውር ጥያቄ ለማዳፈን ቢጥሩም የ 23 አመቱ ተጫዋችና የአርሰናልን ግንኙነትን የተመለከቱ የዝውውር ሀሜቶች በስፋት መነገራቸውን ቀጥለዋል። 

               የአጨዋወት መንገድ

ቤሎቲ የፊት አጥቂ ሚና ያለው ተጫዋች ሲሆን በአሁኑ ወቅትም በ 4-3-3 አጨዋወት በዘጠኝ ቁጥር ቦታ ላይ እየተጫወተ ይገኛል። ከማጥቃት በተጨማሪ ቡድኑ ሲጠቃ ወደ ኃላ ተመልሶ የቡድኑን አባላት በመከላከል ዙሪያ ለማገዝ  በሚያደርገው ያላሰለሰ ሙከራ ምክንያት በጠንካራ የስራ ስነምግባሩ ይታወቃል። ከዚህ በተጨማሪም ያለው ጥንካሬ፣ የአየር ኳስ ላይ ብቃቱ (ዘንድሮ ካስቆጠራቸው 13 ጎሎች አራቱ በጭንቅላት ያስቆጠራቸው ናቸው) እንዲሁም ፍጥነቱ ከአንድ የዘመናዊ እግር ኳስ አጥቂ የሚጠበቁ ሁሉንም ብቃቶች ያሟላ እንደሆነ ይመሰክራል። 

የቤሎቲ የ2016/17 የውድድር ዘመን ቁጥራዊ እውነታዎች

ተጫወተ – 16

አገባ – 13

ወደግብ የመታቸው ዒላማቸውን የጠበቁ ኳሶች – 60%

የፈጠራቸው የግብ ዕድሎች – 3 

የፈጠራቸው የኳስ ቅብብል መጠን – 78%     

               እግር ኳሳዊ ህይወቱ

የቤሎቲ የእግር ኳስ ህይወት የጀመረው በ2013 ወደ ፓሌርሞ ባመራበት ወቅት ሲሆን በዛው አመትም 10 ጎሎችን ለክለቡ በማስቆጠር ፓሌርሞ ወደ ጣሊያን ሴሪአ ኤ እንዲያድግ ትልቅ አገዛ አድርጓል። በጣሊያን ሴሪአ በተጫወተበት የመጀመሪያ አመትም በክለብ አጋሩ ፓውሎ ዳይባላ ቢሸፈንም ስድስት ጎሎችን ማስቆጠር ቻለ። 

በ2015 የክረምት የዝውውር መስኮትም በ 7.5 ሚሊዮን ዩሮ ቶሪኖን ተቀላቅሎ የእግር ኳስ እድገቱን ቀጠለ። በክንፍ ተጫዋችነት የቶሪኖ ህይወቱን ጀምሮም ባሳለፍነው የውድድር ዘመን 12 ጎሎችን ማስቆጠር ቻለ። በዘንድሮ የውድድር ዘመን ደግሞ ካምናው ይበልጥ ተሻሽሎ ገና ካሁኑ በ 16 የሴሪአው ጨዋታዎች ላይ 13 ጎሎችን ለማስቆጠር  በቅቷል። 

ይህ ስኬታማነቱም በኮንቴ አልጋ ወራሽ ጂያምፔሮ ቬንቱራ ለጣሊያን ብሄራዊ ቡድን እንዲመረጥ አስችሎታል። በአዙሪዎቹ ቆይታውም አምስት ጨዋታዎችን አድርጎ ሶስት ጎሎችን ማስቆጠር ችሏል። ለጣሊያን እግር ኳስም ትልቁ የማጥቃት ተስፋ ሆኖ መታየት ጀምሯል። 

                    የደስታ አገላለፅ
በእግር ኳስ ውስጥ አንድ ተጫዋች የተለየ የደስታ አገላለፅ ልምድ እንዲኖረው በመጠኑም ቢሆን ጀብደኛና ደፋር ሊሆን ያስፈልጋል። የቤሎቲ ጉዳይም ተመሳሳይ ነው። እሱም የቅፅል ስሙን ለማስታወስ ሁሌም ጎል ባስቆጠረ ቁጥር በእጁ የአውራ ዶሮ ራስ (rooster comb) ምልክት ያሳያል።  

የቤሎቲ የአውራ ዶሮ ጭንቅላት
Advertisements