Advertisements
ትኩስ ዜናዎች

ሰበር መረጃ: ማንችስተር ሲቲ ከአበረታች መድሀኒት ጋር በተያያዘ በእንግሊዝ እግር ኳስ ማህበር ክስ ቀረበበት።


በሚኪያስ በ. ወርዶፋ| ረቡዕ ጥር 3, 2009 

የእንግሊዝ እግር ኳስ ማህበርን ጠቅሶ የእንግሊዙ ዘ ጋርዲያን ጋዜጣ ከደቂቃዎች በፊት እንደዘገበው የእንግሊዙ ክለብ የፀረ አበረታች ደንቦችን በመተላለፉ በእንግሊዝ እግር ኳስ ማህበር (FA) ክስ ቀርቦበታል። 

እንደ መረጃው ምንጭ ከሆነ የክሱ ጉዳይ ክለቡ ከአበረታች መድሀኒት ጋር በተያያዘ ያቀረበው ማስረጃ ትክክለኛ ካለመሆን ጋር ተያይዞ መሆኑ ተገልጿል። 

ከእንግሊዝ እግር ኳስ ማህበር የወጣው መግለጫ “ማንችስተር ሲቲ ክለብ ከማህበሩ የፀረ አበረታች መድሀኒት ጋር በተያያዘ ክስ ቀርቦበታል። ክለቡ በፀረ አበረታች መድሀኒት ዙሪያ ያቀረበው መረጃ ትክክለኛና እርግጠኛ ስለመሆኑ ለማህበሩ ማረጋገጥ አልቻለም። በዚህ ምክንያትም የማህበሩን ደንብ ቁጥር 14(መ) ጥሶ ተገኝቷል። ክለቡም እስከ ጥር 19 ድረስ ለክሱ ምላሹን ሊያቀርብ ይገባል።” ሲል የክሱን ጭብጥ ገልጿል። 

ክሱም በክለብ ደረጃ የቀረበ እንጂ የትኛውን የክለቡን አባል በነጠላ የሚወነጅል አይደለም። እንደ ማህበሩ ደንብ ከሆነ የእንግሊዝ ክለቦች በማንኛውም ጊዜ የፀረ አበረታች መድሀኒት ምርመራ ሂደትን ለማፋጠን የክለባቸውን ከፀረ አበረታች መድሀኒት ጋር የተያያዘ መረጃ ለእግር ኳስ ማህበሩ በማቅረብ የመተባበር  ግዴታ እንዳለባቸው ይታወቃል።   

ሲቲ ጥፋተኛ ሆኖ ከተገኘ ቅጣት የሚጠብቀው ሲሆን ክሱም የእንግሊዝ እግር ኳስን ደንብ በመጣስ በመሆኑ ክሱን የማየት ስልጣን ያለው ማህበሩ ብቻ በመሆኑ የአለም ፀረ አበረታች መድሀኒት ኤጀንሲ በጉዳዩ ጣልቃ መግባት እንደማይችል መረጃው ጨምሮ ጠቅሷል። 

Advertisements
About ሚኪያስ በቀለ (313 Articles)
ይህን ዘገባ ያቀረብኩላችሁ የኢትዮአዲስ ስፓርት ኤዲተርና ፀሀፊ እኔ ሚኪያስ በቀለ ነኝ።
%d bloggers like this: