በዘውዱ በሬሳ | ጥር 3,2009


ካደገባት አገር እንግሊዝ ይልቅ የትውልድ አገሩ አይቮሪኮስትን መርጦ ለአፍሪካ ዋንጫ ዝግጅት ላይ ባለው ስብስብ ውስጥ የተካተተው ዊልፍሬድ ዛሃ በውሳኔው እንደማይፀፀትና ይልቁንም በጣም ደስተኛ እንደሆነ ተናግሯል፡፡

በ 4 አመቱ ወደእንግሊዝ በማቅናት እድገቱን በዚያ ያደረገውና በ 12 አመቱ የክሪስታል ፓላስ አካዳሚን በመቀላቀል የእግር ኳስ ፈሩን የጀመረው ዛሃ በ 2012 እና በ 2013  ከስውዲንና ከስኮትላንድ ጋር በተደረጉት የወዳጅነት ጨዋታዎች ላይ እንግሊዝን መወከል የቻለ ቢሆንም ለፊፋ ያቀረበው ለኮትዲቯር የመጫወት አቤቱታ ተቀባይነትን አግኝቶለታል፡፡​

ዛሃ ስለዚህ ጉዳይ ሲናገር “እድገቴ በእንግሊዝ እንደመሆኑ ለእንግሊዝ ታዳጊና ወጣት ቡድኖች መጫወቴ ያለ ነገር ነው ፤ ባለፉት አራት አመታት ግን በጉዳዩ ላይ ብዙ ሳስብ ነበር፡፡ በመጨረሻም ለአገሬ መጫወትን ምርጫዬ አድርጌአለሁ ፤ ለዚህ የመጀመሪያ ምክንያቴ ግልፅ ሲሆን እሱም አገሬን መርዳት ስለምፈልግ ነው ። ሌላው ምክንያቴ ደግሞ የአይቮሪኮስት ምርጥ ስብስብ አባል መሆኔ የሚያኮራ ስለሆነ ነው ”

“ጋቦን ላይ ሶስተኛውን የአፍሪካ ዋንጫ ለአገራችን ለማስገኘት መስዋህትነትን መክፈል አለብን ፤ ቀጥለን ደግሞ ለ 2018 የዓለም ዋንጫ አገራችንን ለማሳለፍ እንሰራለን” በማለት አጠቃሏል፡፡

ዛሃ የመጀመሪያ ጨዋታውን ባለፈው እሁድ ከስውዲን ጋር በአቡዳቢ በተደረገው የወዳጅነት ጨዋታ ላይ ሲያደርግ በጨዋታውም አገሩን ለአሸናፊነት ያበቃችውን ጎል አስቆጥሯል ፤ ዛሬ ምሽት ዝሆኖቹ ከሌላኛዋ የሻምፒዮናው ተሳታፊ አገር ኡጋንዳ ጋር የሚጫወቱ ሲሆን ለዛሃም ሁለተኛ ጨዋታው ይሆናል ተብሎ ይጠበቃል፡፡

Advertisements