በሚኪያስ በ. ወርዶፋ | ረቡዕ ጥር 3፣ 2009 ዓ.ም

የካርቴጅ ንስሮች ባለፉት ስድስት የአፍሪካ ዋንጫ ውድድሮች ከሩብ ፍፃሜ ማለፍ አልቻሉም፡፡ ዘንድሮ ወደ ጋቦን የሚያመሩት ግን በ2004 የሰሩት የዋንጫ ስኬት መነሳሻ እንዲሆናቸው በማሰብ ነው፡፡ በወቅቱ ቱኒዚያዎች ዋንጫውን ሲወስዱ ለመጀመሪያና ለብቸኛ ጊዜ ነበር፡፡ ዘንድሮ ግን አልጄሪያና ሴኔጋልን የያዘው ምድባቸውን ማልፍ እራሱ ለንስሮቹ ከባድ ይመስላል፡፡ 

የቱኒዚያ ወሳኝ ተጫዋቾች እነማን ናቸው?

1. አይመን አብድናወር፣ ተከላካይ (ቫሌንሲያ)

ይህ የመሀል ተከላካይ የቱኒዚያ የመከላከል ክፍል የልብ ምት ሲሆን በቡድኑም የመጀመሪያው ተጠቃሽ ተጫዋች ነው፡፡ ከቫሌንሲያ ጋር ባለው ቆይታ የቱኒዚያ ባለ ትልቅ ስም ተጫዋች ሲሆን ለሀገሩ ያደረጋቸውን ጨዋታዎች 50 ለማድረስም አንድ ጨዋታ ብቻ ይቀረዋል፡፡ የ27 አመቱ ተጫዋች በመጪዎቹ ጊዜያት ወደ ፕሪምየር ሊጉ ክለቦች ኤቨርተንና ቼልሲ ሊያመራ እንደሚችልም ይጠበቃል፡፡

2. ዋህቢ ካህዚር፣ የአጥቂ አማካኝ፣ ሰንደርላንድ

ካህዚር ዴቪድ ሞይስ ወደ ስታዲየም ኦፍ ላይት ከመጡ ወዲህ በቋሚነት ተከታታይ ጨዋታዎች ላይ የመሰለፍ እድሎችን ለማግኘት ቢቸገርም ባሳለፍነው የውድድር ዘመን ሰንደርላንድ በሊጉ እንዲቆይ ትልቅ ሚና ነበረው፡፡ ለቱኒዚያ ብሄራዊ ቡድንም በ27 ጨዋታዎች ላይ 10 ግቦችን በማስቆጠር ወሳኝ ተጫዋች መሆኑን ማስመስከር ችሏል፡፡ 

የቱኒዚያ የአፍሪካ ዋንጫ ተጫዋቾች ስብስብ

ግብጠባቂዎች፡ አይመን ማቱልቲ (ኢኤስ ሳህል)፣ ራሚ ጃርዲ (ሲኤስ ሰፋክሲየን)፣ ሞእዝ ቤን ሼሪፋ (ኢኤስ ቱኒዝ)

ተከላካዮች፡ ሀምዛ ማቱልቲ (ሲኤስ ሰፉክሲየን)፣ አይመን አብዱኑር (ቫሌንሲያ/ስፔን)፣ አሊ ማሉል (አልአለህሊ/ግብፅ)፣ ዘይድ ቦጋታስ (ኢኤስ ሳህል)፣ ሞሀመድ አሊ ያኮቢ (ሳይከርራዝስፑር/ቱርክ)፣ ቻሜስዲን ዳሆአዲ (ኢኤስ ቱኒዝ)፣ ምዲ ናጉዝ (ኢኤስ ሳህል/ቱኒዚያ)፣ ስሊመኒ ኮሆክ (ሲኤ ቤዘርቲን)፣ ሲያም ቤን የሱፍ (ሴአን/ፈረንሳይ)

አማካኞች፡ ላሪ አዙኒ (ኒምስ/ፈረንሳይ)፣ ፈርጃኒ ሳሲ (ኢኤስ ቱኒዝ)፣ ሞሀመድ አሚን ቤን አሙር (ኢኤስ ሳህል)፣ ዋሂብ ካሀዝሪ (ሰንደርላንድ/እንግሊዝ)፣ ሀምዛ ላህማር (ኢኤስ ሳህል)፣ ዩሴድ ማስካኒ (ሌክህዊያ/ኳታር)፣ ናይም ስሊቲ (ሊል/ፈረንሳይ)

አጥቂዎች፡ ሳብር ከሊፍ (ክለብ አፍሪካ)፣ አህመድ አካይቺ (ኢትሀድ ጅዳ/ሳውዲ አረቢያ)፣ አህመድ ካህሊል (አልአህሊ ዱባይ/ሳውዲ አረቢያ)፣ ጣሀ ያሲን ኬኒሲ (ኢኤስ ቱኒዝ)

ቱኒዚያ እንዴት ለውድድሩ ለማለፍ በቃች?

ቱኒዚያ የማጣሪያውን ምድብ ከቶጎ፣ ላይቤሪያና ጅቡቲ በልጣ በአንደኝነት ነው ያጠናቀቀችው፡፡ በምድብ ጨዋታዎቹ ጅቡቲን 8-1 የረቱበትም ግጥሚያ በታሪካቸው በሰፊ የጎል ልዩነት ያሸነፉበት ጨዋታ ነው፡፡ 

የቱኒዚያ አሰልጣኝ ማን ናቸው?

የቀድሞው የፖላንድ ተጫዋች ሄነሪክ ዉጂች ካስፐርዛክ በ37 የአሰልጣኝነት ዘመናቸው 17 ቡድኖችን ማሰልጠን የቻሉ ናቸው፡፡ ቱኒዚያን በድጋሚ ለማሰልጠን በ2015 ከመምጣታቸው በፊትም የካርቴጅ ንስሮችን በ1996 የአፍሪካ ዋንጫ መምራት ችለዋል፡፡ ካስፐርዛክ እንደ አይቮሪኮስት፣ ማሊ፣ ሞሮኮና ሴኔጋል አይነቶቹን ቡድኖች በማሰልጠን ከፍተኛ የአፍሪካ ዋንጫ ልምድ ያላቸው አሰልጣኝ ናቸው፡፡
የቱኒዚያ የአፍሪካ ዋንጫ ታሪክ ምን ይመስላል?

ቱኒዚያ በውድድሩ ላይ ለ16 አጠቃላይ ጊዜ መሳተፍ ችላለች፡፡ በ2004 የአፍሪካ ዋንጫ የፍፃሜ ግጥሚያም በሜዳዋ ሞሮኮን 2-1 በማሸነፍ አዲስ ታሪክ መፃፍ ችላለች፡፡ ከዛ ወዲህ ግን ከሩብ ፍፃሜው ማለፍ ሳይችሉ ቀርተዋል፡፡
በውድድሩ ላይ ከቱኒዚያ ምን ይጠበቃል? 

ቱኒዚያ ለዋንጫው ግምት በጣም የራቀች ስትሆን በምድብ ድልድሉም ከጠንካሮቹ አልጄሪያና ሴኔጋል ጋር እንድትጫወት በምድብ ሁለት ተደልድላለች፡፡

Advertisements