በዘውዱ በሬሳ | ጥር 11,2009



ታላቁ አትሌት ቀነኒሳ በቀለ በነገ ምሽቱ የዱባይ ማራቶን ሪከርድ ለማሻሻል እንደሚሮጥ ተናገረ፡፡ ከአለም አቀፉ የአትሌቲክስ አስተዳዳሪ ተቋም(IAAF) ድረ ገፅ ጋር ቆይታ ያደረገው ቀነኒሳ ያለፉት ማራቶኖች ልምዱና የዱባይ የሩጫ መንገድ ህልሙን ለማሳካት እንደሚረዱት ተስፋ ማድረጉን ገልጿል

“በማራቶን ያለህን አቅም ለማሻሻል ረጅም ጊዜ ይፈልጋል” ያለው ቀነኒሳ በዘንድሮ የበርሊን ማራቶን የዓለም ክብረወሰንን ለጥቂት አጥቶ የኢትዮጵያ ሪከርድን የሰበረ ሲሆን ከሁለት አመታት በፊት በተደረገው የዱባይ ማራቶን አቋርጦ መውጣቱ ይታወቃል፡፡

“ከሁለት አመታት ውጣ ውረድ በኋላ አሁን ጥሩ የማራቶን ሰው እንደሆንኩ ይሰማኛል ፤ ዱባይ ልክ እንደበርሊን ምቹ መሮጫ ያለው የማራቶን ውድድር ነው፡፡ ስለዚህ የተሻለ ነገር መስራት እንደምችል አስባለሁ፡፡ የምሮጠው የአለምን ሪከርድ ለመስበር ነው”

“እርግጥ ነው ይህ ውድድር ነውና ሁሉም ነገር እንዳሰብኩት ላይጓዝ ይችላል፡፡ ይህ በሩጫው ላይ በሚገጥሙህ ሁኔታዎች ይወሰናል ፤ በርሊን  ላይ ትኩረቴ የነበረው የራሴንና የአገሬን ክብረወሰን ለማሻሻል ነበር፡፡ ይህን ማሳካት ችያለው ፤ አሁን ዱባይ ላይ ትኩረቴ የዓለምን ሪከርድ ለመስበር ነው፡፡ ይህን ለማሳካት የሚያስችለኝ አቋም ላይ እገኛለሁ” በማለት አትሌቱ ለድረ ገፁ ቃሉን ሰጥቷል፡፡ 

የዱባይ ማራቶን ነገ አርብ ምሽት የሚካሄድ ይሆናል፡፡

Advertisements