በ ወንድወሰን ጥበቡ | ሃሙስ ጥር 10፣ 2009 ዓ.ም


ጀርመናዊው የአርሰናል ተከላካይ ሽኮድራን ሙስጣፊ በዚህ የውድድር ዘመን ከየትኛውም የፕሪሚየር ሊግ ተጫዋች በላይ በ14 የፕሪሚየር ሊግ ጨዋታዎች ላይ ያለመሸነፍ ጉዞ እያደረገ ይገኛል።

መድፈኞቹ በዚህ የውድድር ዘመን ሽንፈት የገጠማቸው በሶስት ጨዋታዎች ላይ ብቻ ነው። እነዚህም በውድድር ዘመኑ የመክፋቻ ጨዋታ በሊቨርፑል እንዲሁም በታህሳስ ወር በተከታታይ በኤቨርተንና በማንችስተር ሲቲ የደረሱባቸው ሽንፈቶች ናቸው።

ይሁን እንጂ ጀርመናዊው ተከላካይ አርሰናል ሳውዛምፕተንን 2ለ1 እስከረታበትና ለክለቡ የመጀመሪያውን ጨዋታ  እስካደረገበት የመስከረሙ ጨዋታ ድረስ ለክለቡ አልተጫወተም። እንዲሁም በገጠመው የቋንጃ ጉዳት በታህሳስ ወሩ ሁለት የአርሰናል ሽንፈቶች ላይ አልተሰለፈም።

ሌላው የቡድን አጋሩ ኬረን ጊብስም 14 ጨዋታዎች ያህል በፕሪሚየር ሊጉ ሽንፈት ያልገጠመው ቢሆንም ያለመሸነፍ ጉዞው መነሻ ግን ያለፈው ዓመት ነበር። በዚህ የውድድር ዘመን መሰለፍ የቻለውም 205 ደቂቃዎች ላይ ብቻ ነበር።

የማንችስተር ዩናይትዶቹ ዳቪድ ደ ህያ፣ ፖል ፖግባና ማርኮስ ሮሆ በጆዜ ሞሪንሆው ወቃታዊ 12 ያለመሸነፍ ጉዞዎች ላይ ሽንፈት አልገጠማቸውም። እንዲሁም ፊል ጆንስና ማቲዮ ዳርሜንም እንዲሁ 12 ያለመሸነፍ ጉዞዎችን አድርገዋል።

የሊቨርፑሉ ፊሊፔ ኮቲንሆም ሊቨርፑል በቦርንማውዝ 4ለ3 በሆነ ውጤት ከመሸነፉ በፊት በገጠመው የቁጭምጭሚት ጉዳት የተነሳ ባለመሰለፉ ከዚህ ጨዋታ በፊት በ12 የፕሪሚየር ሊግ ጨዋታዎች ላይ ያለመሸነፍ ጉዞ አድርጓል።

ሌላው የሊቨርፑል አጋሩ ዮል ማቲፕም እንዲሁ መሰለፍ በቻለባቸው 12 የፕሪሚየር ሊግ ጨዋታዎች ላይ ሽንፈት አልገጠመውም።

እናስ ሙስታፊ ይህን ያለመሸነፍን ጉዞ በማስቀጠል የአርሰን ቬንገሩ ቡድን የሊጉ አናት ላይ ከተቀመጡት የለንደን ተቀናቃኞቹ ቼልሲና ቶተንሃም ጋር ያለውን ልዩነት ለማጥበብ እገዛ ማድረግ ይችል ይሆን?

አርሰናል በስምንቱ መጨረሻ በፕሪሚየር ሊጉ በሜዳው ከበርንሌይን ይገጥማል።

Advertisements