By Eyob Dadi|ጥር 14,2009 ዓም


ከተጀመረ አንድ ሳምንት የሞላው የጋቦኑ የአፍሪካ ዋንጫ ጨዋታዎች ቀጥለዉ እየተከናወኑ ይገኛሉ።

<!–more–>

በምድብ አራት ሁለተኛ ጨዋታቸውን ያደረጉት ግብጽ እና ዩጋንዳ እልህ አስጨራሽ ፍልሚያ አድርገዋል።

በፈጣን አጀማመር ጎል ለማስቆጠር የተጫወቱት ግብጾች በዩጋንዳዎች የተደራጀ እንቅስቃሴ ክፍተት ለማግኘት ተቸግረዋል።

ፈርኦኖቹ በኳስ ቁጥጥሩ የመጀመሪያዎቹን 30 ደቂቃዎች ቢሻሉም ምንም አይነት ግልጽ የግብ እድል መፍጠር አልቻሉም።

ዩጋንዳዎች በበኩላቸው ይዘውት የገቡት ታክቲክ የግብጾችን እንቅስቃሴ በማበላሸት የተዋጣለት ነበር።

በሁለተኛው ግማሽ ተመጣጣኝ እንቅስቃሴ የተደረገ ሲሆን ሁለቱም ለመሸናነፍ እልህ አስጨራሽ ፍልሚያ አድርገዋል።

በሁለተኛው ግማሽ የነበሩ ውስን ሙከራዎችም በሁለቱ ልምድ ባላቸው ግብ ጠባቂዎች ተመልሰዋል።

ነገርግን 89ኛው ደቂቃ ላይ የመሀመድ ሳላህ ብልጠት የታከለበት ምርጥ እንቅስቃሴ ፈርኦኖቹ አሸናፊ እንዲሆኑ አድርጓቸዋል።

ሳላህ አመቻችቶ ያቀበለውን ሰይድ አክርሮ መቶ ባስቆጠራት ጎል ፈርኦኖቹ  1-0 ማሸነፍ ችለዋል።

ከምድቡ ግብጾች አራት ነጥብ ሲይዙ ዩጋንዳ ያለምንም ነጥብ የመጀመሪያዋ ተሰናባች አገር መሆኗን አረጋግጣለች።

ከጨዋታው በኋላ ሰርዶቪች ሙሉቲን ሚቾን ጨምሮ የዩጋንዳ ተጨዋቾች በሀዘን ድባብ ውስጥ ሆነው ሜዳውን ለቀው ወጥተዋል።

Advertisements