Advertisements
ትኩስ ዜናዎች

ጋዜጣዊ መግለጫ : ሞውሪንሆ በሳምንታዊው መግለጫቸው ብዙ ጉዳዮች ላይ አስተያየታቸውን ሰጥተዋል።

ሞውሪንሆ በሳምንታዊው መግለጫቸው ብዙ ሀሳቦችን አንስተዋል።

በሚኪያስ በ. ወርዶፋ | ቅዳሜ ጥር 13, 2009 

1. ስለተከታታይ ድሉ ትልቅ ትኩረት መስጠት አለመፈለጋቸው

ፓርቹጋላዊው አለቃ መግለጫቸውን የጀመሩት ስለ ቡድኑ በ 16 ተከታታይ ጨዋታ ያለ ሽንፈት የመጓዝ ስኬትን አስመልክቶ በሰጡት መልስ ነው።

ጆሴ ሲናገሩ “ስለ ተከታታይ ድላችን አልጨነቅም። እኛ የምንጫወተው አንድ ተጨማሪ ጨዋታ ላለመሸነፍ ወይ ደግሞ ያለመሸነፍ ሪከርዳችንን 18 ወይም 20 ለማድረስ አይደለም።

“ጨዋታዎችን ማሸነፍ እንፈልጋለን። ጨዋታዎችን ለማሸነፍ ከፍተኛ ጥረት እናደርጋለን። ከተሸነፍን በቃ ተሸነፍን ነው። እስካሁን ለብዙ ተከታታይ ጨዋታዎች ያደረግነው ያለመሸነፍ ጉዞ ያበቃለታል።

“ወደ ስቶክ ሜዳ የምናመራው ያለመሸነፍ ጉዟችንን ለማስጠበቅ አይደለም። የተጓዝንበት መንገድ በጣም የሚያምር እንደሆነ እምናለሁ። ነገር ግን ዛሬ የምንጫወተው ሪከርድ ለማስጠበቅ አይደለም።” ብለዋል።

2. የያንግ የቻይና ዝውውር ጭምጭምታ

ሞውሪንሆ ከሰሞኑ ከቻይና ክለቦች የዝውውር ጥያቄ ቀርቦለታል ተብሎ ስለተወራለት የክንፍ ተጫዋቻቸው ተጠይቀው “አላውቅም። ምክንያቱም ወሬውን የሰማሁት ከሚዲያው ነው። አሽሊ እራሱ መጥቶ ስለ ሁኔታው ካልነገረኝ ለወሬው ምንም ቦታ አልሰጠውም።” ሲሉ መልሰዋል።

3. የጥር ወይስ የክረምት የዝውውር መስኮት

“ሁሌም እንደማስበው ለተጫዋች ዝውውር ጥሩው ጊዜ ክረምት ነው። ሁሌም የጥር የዝውውር መስኮትን የምመለከተው ለአጣዳፊ ችግሮች መፍትሄነት ወይም ደግሞ ለቀሪው የውድድር ዘመን መነሳሻ ነው። ነገር ግን ቀላል የገበያ ወቅት አይደለም።”

4. ከክለቡ የሚለቁ ተጫዋቾችን ለመተካት ምን ታስቧል ?

ሞውሪንሆ በዚህ በጥር ክለቡን የሚቀላቀሉ ተጫዋቾች ስለመኖራቸው ተጠይቀው ሲመልሱ “በአንዳንድ ቦታዎች ላይ በቂ የተጫዋች ቁጥር አለን። በቀሪው የውድድር ዘመን ብዙ የምንሳተፍባቸው ዋንጫዎች ሲኖሩ በመጪዎቹ ሚያዚያና ግንቦት ብዙ ጨዋታዎች ይጠብቁናል። በአንዳንድ ቦታዎች ብዙ የተጫዋች አማራጭ ስለሌለን ችግሮች ሊያጋጥመን ይችላል። ነገር ግን በጉዳት በኩል በጣም ስኬታማ ነን። እንደማምነው እስከ አመቱ መጨረሻ ያለ ችግር የምንሳተፍባቸውን ፉክክሮች በበላይነት እንደምንወጣ አስባለሁ።” ብለዋል።

5. ክለቡን ስለለቀቀው ሜምፈስ ዲፔይ

“ቫንሀል ሲገዙት በጣም ልክ ነበሩ። በአለም ዋንጫው ላይ የሆላንድን ብሄራዊ ቡድን ሲያሰለጥኑ በወጣትነቱ ጥሩ ብቃት ሲያሳይ ያውቁታል። የደች ሊግ ተመሳሳይ ባይሆንም ተጫዋቹ በሆላንድ ሊግ ጥሩ ብቃትን አሳይቷል። በዩናይትድ በቆየበት 18 ወራት ባይሳካለትም ገና ወጣት ነው። አዲሱ ክለቡ ይህን የተጫዋቹን ክህሎት መጠበቅ ይኖርበታል። እኛም በሊዮን ክለብ ጥሩ ብቃት እንዲያሳይ እንመኛለን።”

6. አዳዲስ የጉዳት መረጃ

ሞውሪንሆ በመጨረሻ ከዛሬ ምሽቱ የፓተሪሶች ጨዋታ በፊት በቡድናቸው ስላለ የጉዳት ሁኔታ ሲጠየቁ “ተመሳሳይ ነገር ላይ ነን። በጣም ሰላም ነን። ትንሽ ችግር አለችብን። ከዛ ውጪ በጣም በጥሩ ሁኔታ ላይ ነን።” ሲሉ ቡድናቸው ከጉዳት ነፃ መሆኑን ተናግረዋል።

Advertisements
%d bloggers like this: