Advertisements
ትኩስ ዜናዎች

ተጀመረ! ኳስም በአሬና ኮንዳ መሽከርከር ጀመረች፣ቻፒኮኤንሴ

By Eyob Dadi|ጥር 15,2009 ዓም


ባላለፉት ወራት መላው የእግርኳስ ወዳጆች በተለይም ብራዚሎች በጥልቅ ሀዘን ውስጥ ገብተው ሁሉም በአንድነት ድምጻቸውን አጉልተው ህብረታቸውን እና አንድነታቸውን ከክለቡ ጎን በመቆም አሳይተዋል።

የአለም ተጨዋቾች፣ደጋፊዎች እና እግርኳስ ወዳጆች በሙሉ በተለያዩ መንገዶች ሟቾችን በማስታወስ በጸሎት ፈጣሪ ነብሳቸውን እንዲምርላቸው ለምነዋል።

ከአሳዛኙ ትራጄዲ መልስ ላለፉት ወራት በቡድን ግንባታው ስራ ላይ ጫማቸውን ከሰቀሉበት አውርደው በቁርጠኝነት ለክለቡ ለመጫወት ፍላጎት ካሳዩት ጀምሮ በውሰት ከሌሎች ክለቦች የተቀላቀሉ በማዋሀድ ቡድኑ ተመልሶ እንዲቆም ጥረት ተደርጓል፣ቻፒኮኤንሴ

ከዚህ ሁሉ ከባድ ፈተና በኋላ የመጀመሪያ የአቋም መፈተሻ ጨዋታቸውን ትናንትና ከፓልሜራስ ጋር ሲያደርጉ የ 20 ሺ ደጋፊዎች ስሜት አሁንም በእንባ ዘለላዎች ተሞልቶ ነበር።

19 ተጨዋቾችን ጨምሮ 71 ተሳፋሪዎች ካለቁበት እልቂት ውስጥ የተረፉት 6 ተሳፋሪዎች ውስጥ ግብ ጠባቂው ጃክሰን ፎልማን፣ተከላካዩ ኔቶ እና የመስመር ተጨዋቹ አለን ሩሼል በመጀመሪያው ጨዋታ ላይ በስታድየሙ ተገኝተዋል።

በህይወት የተረፈው ግብጠባቂው ጃክሰን ፎልማን

በተለይ ግብ ጠባቂው ጃክሰን ፎልማን በአደጋው አንድ እግሩ ተቆርጦ በዊልቼር እየተገፋ  ጓደኞቹን እያስታወሰ ተንሰቅስቆ ሲያለቅስ ልብ ይነካ ነበር።

እነዚህ በህይወት የተረፉት ተጨዋች ጨዋታው ከመጀመሩ አስቀድሞ ወደ ሜዳው ገብተው የኮፓ ሱዳሜሪካና ዋንጫ ክለቡን ወክለው ሲቀበሉ ደስታ ሳይሆን ሀዘን፣ሳቅ ሳይሆን እንባ ፊታቸውን ሸፍኖት ነበር።

የቻፒኮኤንሴ ማስኮት የለበሰ ደጋፊ ህዝቡን ሲያነቃቃ

ደጋፊዎች ከጨዋታው በፊት የዋንጫ ስነስርአቱ ላይ የክለቡን ባጅ(አርማ)ከፍ አድርገው አሳይተዋል።

በትናንቱ ጨዋታም 2-2 ሲጠናቀቅ ለቻፔኮኤንሴ ዶግላስ ግሮሊ እና ዊልያም አማራል ጎሎቹን አስቆጥረዋል።

ጨዋታው 71ኛው ደቂቃ ላይ ተቋርጦ ህይወታቸውን ላጡ 71 ሰዎችን በጭብጨባ አስበዋቸዋል።

 

Advertisements
About ዕዮብ ዳዲ (1159 Articles)
ይህን ጽሁፍ ያዘጋጀሁላችሁ የኢትዮአዲስ ስፓርት ድረገጽ አዘጋጅ እና የስፓርት ፀሀፊ ዕዮብ ዳዲ ነኝ።
%d bloggers like this: