Skip to content
Advertisements

ዌትሃም በዲምትሪ ፓየ የዝውውር ክፍያ ከስምምነት መድረሱን ገለፀ

በ ሚኪያስ በ. ወርዶፋ | እሁድ ጥር 21፣ 2009 ዓ.ም



ዌስትሃም በዲሚትሪ ፓየ 25 ሚሊዮን ፓውንድ የዝውውር ክፍያ ከፈረንሳዩ ማርሴ ጋር ከስምምነት ላይ ደርሷል።

እንደስካይ ስፖርት ዘገባ ከሆነ የዌስትሃሙ የፊት ተጫዋች ለህክምና ምርመራ እና በግል ጉዳዮች ላይ ከፈረንሳዩ ክለብ ጋር ለመነጋጋረ ወደፈረንሳይ በማምራት ላይ ይገኛል።

ስካይ ስፓርትን ጠቅሶ የእንግሊዙ የእለተ ሰንበት ጋዜጣ የሆነው ሰን ኦን ሰንዴይ እንደዘገበው በ 29 አመቱ የአጥቂ አማካኝ ዙሪያ ክለቡ ዌስትሀም ከፈረንሳዩ ማርሴይ የቀረበውን 25 ሚሊዮን ፓውንድ መቀበሉ ታውቋል። ፓዬትም በሚያገኘው ግላዊ ጥቅማ ጥቅሞች ዙሪያ ከቀድሞ ክለቡ ጋር ስምምነት ላይ መድረሱንና ዝውውሩን ለማጠናቀቅ ለህክምና ምርመራ ወደ ፈረንሳይ እያቀና መሆኑን ጋዜጣው ጨምሮ ፅፏል። 

ይህ የተጨዋቹ ዝውውር በስምምነት የሚቋጭ ከሆነም በፈረንሳዊው አጥቂና በለንደኑ ክለብ መካከል ያለውን ሰሞነኛ የተንዛዛ አለመግባባት መፍትሄ የሚያገኝ ይሆናል። ማርሴዎች በቀድሞ ተጫዋቻቸው ላይ ያላቸው ፍላጎት የተነሳሳው ፓዬት ለቆፍጣናው የክለቡ አለቃ ስላቪያን ቢሊች ከዚህ በኃላ ለዌስትሀም መጫወት እንደማይፈልግ በግልፅ ካስታወቀበት ሰአት ጀምሮ ነው። 

ተጫዋቹ በክለብ ያለመቆየት ፍላጎትም ብዙ ውዝግቦችንና ከክለቡና ደጋፊው ጋር ከባድ መቃቃር ውስጥ ከቶት ሰንብቷል። ከመዶሻዎቹ ዋና ቡድን እንዲቀነስም ምክንያት ሆኖታል። ከዚህ በተጨማሪም ባሳለፍነው ሳምንት በተጫዋቹ ድርጊት በተቆጡ የክለቡ ደጋፊዎች የቤቱ መስኮቶች በእንቁላል መደብዳባቸው የለንደኑ ክለብ ለተጫዋቹ ደህንነት በመስጋት የ24 ሰአት የጥበቃ አገልግሎት እንዲመድብ አስገድዶታል።

ማርሴይ ከዚህ ቀደም ያቀረባቸው ሶስት የዝውውር ዋጋዎች ውድቅ የተደረጉበት ሲሆን የአሁኑና አራተኛው ግን በለንደኑ ክለብ ተቀባይነት ያገኘ መስሏል። የ29 አመቱ አማካኝ በማርሴይ ባደረገው የሁለት አመት ቆይታ 72 ጨዋታዎችን ማድረግ ችሏል። ከዛም በ2015 የፈረንሳዩን ክለብ ለቆ መዶሻዎቹን ተቀላቅሏል። 

ባሳለፍነው አመት የካቲት በዌስትሀም የሚያቆየውን የአምስት አመት ከግማሽ አዲስ የውል ማራዘሚያ ከፈረመ ገና አመትም ያልሞላው ፓዬት አሁን ተመልሶ ወደ ቀድሞ ክለቡ ለመቀላቀል ከጫፍ የደረሰ አስመስሎታል። 

በሌላ በኩል የለንደኑ ክለብ ከሁለት ቀናት በፊት ከሁል የክንፍ አማካኙን ሮበርት ስኖድግራሱን በማስፈረሙ ለፈረንሳዊው ምትክ ማግኘቱን እርግጠኛ በመሆኑ የፓዬትን የዝውውር ሂሳብ ለመቀበል ምክንያት እንደሆነው ተጠርጥሯል።
ዝውውሩ የሚሳካ ከሆነም በተጫዋቹና በለንደኑ ክለብ መካከል ተፈጥሮ የሚገኘው ግጭት መቋጫ የሚያገኝ ይሆናል።

Advertisements
%d bloggers like this: