ፊሊፔ ኮቲንሆን ቅዳሜ ምሽት ሊቨርፑል በአንፊልድ ቶተንሃም ሆትስፐርን በረታበት ጨዋታ የመጀመሪያ አጋማሽ ላይ የፈፀመው ድርጊት የብዙዎችን ቀልብ ስቦ ነበር።

ብራዚላዊው የጨዋታ አቀጣጣይ ብዙውን ጊዜ የሚታወቀው በግል ክህሎቱና ፈጣን በሆነው የማጥቃት እንቅስቃሴው ነበር። ነገር ግን አሁን በዚህበ ጨዋታ ላይ በፈፀመው ያልተለመደ ዓይነት የመከላከል ዘዴ የብዙዎችን ትኩረት ስቧል።

ኮቲንሆ ቡድኑ 2ለ0 በመምራት ላይ በነበረበትና በጨዋታው 34ኛ ደቂቃ የቶተንሃሙ ክርስቲያን ኤሪክሰን ለመምታት የተዘጋጀውን የቅጣት ምት ኳስ ለሸፈን ከተደረደሩት የቡድን አጋሮቹ ጀርባ በጉልበቱ በመንበርከክና ከቅጣት መቺው እይታ ውጪ በመሆን መሬት ለመሬት የምትመታን ኳስ ለመመለስ ተዘጋጅቶ ታይቷል።

የ24 ዓመቱ የቀዮቹ ተጫዋች በአንድ እግሩ በመንበርከክና አንደኛውን ደግሞ በማጠፍ የተቻለውን ያህል በኤሪክሰን መሬት ለመሬት ተመታ የምትመጣን ኳስ የሊቨርፑል አጋሮቹ ጀርባ በመሆን ለመሸፈን ሙከራ አድርጓል።

ጨዋታውን ይዘግቡ የነበሩና የማህበራዊ ሚዲያው ተጠቃሚዎች እንዲህ ዓይነቱን የመከላከል ዘዴ ፈፅሞ አይተውት እንደማያውቁ ሲገልፁም ቆይተዋል። ነገር ግን ይህን አይነቱን ዘዴ ለመጀመሪያ ጊዜ ተግባራዊ ያደረገው ኮቲንሆ አልነበረም። ይልቁንስ ዘዴውን ወስዶ ተግባራዊ ያደረገው ከብሄራዊ ቡድን አጋሩ ነው።

ብራዚል ባለፈው ህዳር ወር አርጄንቲናን በወዳጅነት ጨዋታ 3ለ0 ማሸነፍ በቻለችበትና ኮቲንሆም በተሳተፈበት ጨዋታ ላይ ይህን አይነቱን ብልሃት የታከለበት የመከላከል ድርጊት ተግባራዊ ያደረገው የሪያል ማድሪዱ የመስመር ተከላካይ የሆነው ማርሴሎ ነበር። 

ማርሴሎ አርጄንቲናን ባሸነፉበት ጨዋታ የመጀመሪያ አጋማች በሊዮኖ መሲ ልትመታ ያለችን የቅጣት ምት ኳስ ለመመለስ ተመሳሳዩን ዘዴ ተግባራዊ አድርጎ ታይቷል።

ሆኖም ግን የመከላከሉ ዘዴ ፈጣሪም ማርሴሎ አይደለም። ዘዴው ለመጀመሪያ ጊዜ ተግባራዊ ሆኖ የታየው በብራዚል እግርኳስ በ2014 በኮፓ ዶ ብራዚል የዋንጫ ጨዋታ ፖንቴ ፕሬታ ክለብ ከፓራና ጋር ባደረጉት ጨዋታ ላይ ነበር።

ምንም እንኳ የፓራናው ተጫዋች ሉሲዮ ፍላቪዮ በፖንቴ ፕሬታ ተጫዋች መሬት ለመሬት መምታት እንዳይችል ቢሸፈንበትም ኳስን ግን በግቡ ማዕዘን ላይ ጠምዝዞ በመምታት ከመረብ ማስረፍ ችሏል።

Advertisements